Служба священноисповеднику Василию Кинешемскому
Текст бденной службы святителю и исповеднику Василию, составленной (судя по краегранесию канона) в Макариево-Решемском монастыре, воспроизводится по машинописи, полученной из Свято-Введенского женского монастыря г. Иваново.
Иже во святых отца нашего Василия,
епископа Кинешемского, исповедника
На велицей вечерни
Блажен муж: 1-й антифон.
На Господи воззвах: стихиры на 8, глас 1:
Благочестия поборника теплейшаго, / писаний изъяснителя вдохновеннаго, / исповедника же паче адаманта твердейша / и любве Божественныя таинника известна, / приидите людие, Василия премудраго восхвалим песньми, / яко молитвенника крепка о душах наших.
Приидите, монашествующих собори, / образ восприимите житейских отложения, / приидите пастырие Христови, / любви Божественней поучитеся, / приидите Писаний рачителие, / словес послушайте живаго богослышания, / всех ныне учреждает святитель Василий, / земли Костромския украшение изрядное.
Приидите во искушениих изнемогшии, / приидите лестьми века сего омраченнии, / ко святителю Василию исповеднику новому / припадем усердием вопиюще: / даруй нам образ любве твоея совершенныя, / еже ко Господу рачения теплаго, / и о ближняго истинной пользе тщание, / и духовное во всех преспеяние.
Отечества твоего не оставил еси, отче Василие, / но возвратился еси к пастве твоей, / юже словесы твоими добре упасл еси, / ея же ради многая озлобления, и безчествования, и изгнания претерпел еси, / и ко Христу преселился еси радуяся. / Ныне же паки Церковь, видевши тя в себе, / возвеселися в возвращении твоем, / яко бо дар многоценен приемши мощи твоя, зовет Владыце: / молитвами, Христе, архиерея твоего, / даруй людем Твоим прегрешений прощение и велию милость.
Иные стихиры, глас 4:
Истины водружение, / Православия утверждение, / Царства земнаго разрушения зрителю, / никакоже Царствию Божию внутрь тебе бывшему поколебатися дал еси, / Царству тезоимените, сего ради тя ублажаем, / исповедниче Христов адаманте Василие.
Апостолов преемниче, / страдальцев единонравне, / аще и зрел еси Церковь безбожными терзаему, / никакоже дал еси Ризе Христовей растерзаемей быти, / но сохранил ся еси в твердей вере, образ дав твоим учеником, / бдя и моляся о чадех твоих, / к нимже и нас сопричти, всехвальне Василие.
Святителей удобрение и новомучеников красоту, / о земли Российстей молебника велика, / сошедшеся днесь, о празднолюбцы, / песненными похвалами воспоем глагоюще: / радуйся, чудный пастырю Василие, / властителей тьмы не убоявыйся, / но со ангелы ныне пребываяй, / оттуду же лучами нам облистаяй, славне.
Неправедно от паствы твоея изгнан, отче преподобне, / приобщился еси скорбем и горьким заточением, / в нихже удостоился еси блаженныя кончины, / аки доблественный страдалец, / победив многокозненнаго, / и победы диадимою тя Христос венча, / святителю Василие, молитвенниче о душах наших.
Слава, глас 5:
Радуйся, священная главо, / сосуде избранный Святаго Духа, / церковное украшение, / сирых и вдовиц прибежище, / младенцев и отроков воспитание, / немощных врачу безмездный, / благочестия и чистоты учителю, / нравы подобниче Златоустому, / мужественно положил еси душу твою за паству твою, / Христа, истиннаго Архипастыря подражая. / Егоже моли даровати душам нашим / мир и велию милость.
И ныне, Богородичен, глас тойже: В Чермнем мори:
Вход. Прокимен дне. И чтения.
Премудрости Соломони чтение
Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их: и еже от нас шествие сокрушение, они же суть в мире. Ибо пред лицем человеческим, аще и муку приимут, упование их безсмертия исполнено, и вмале наказани бывше, великими благодетельствовани будут, яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их, возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися Нань, разумеют истину, и вернии в любви пребудут Ему, яко благодать и милость в преподобных Его, и посещение во избранных Его.
Премудрости Соломони чтение
Праведницы во веки живут, и в Господе мзда их, и попечение их у Вышняго: сего ради приимут царствие благолепия, и венец доброты от руки Господни, зане десницею покрыет я, и мышцею защитит их. Приимет всеоружие рвение свое, и вооружит тварь в месть врагом. Облечется в броня правды, и возложит шлем, суд нелицемерен. Приимет щит непобедимый, преподобие. Поострит же напрасный гнев, во оружие: споборет же с ним мир на безумныя. Пойдут праволучныя стрелы молниины, и яко от благокругла лука облаков, на намерение полетят. И от каменометныя ярости, исполнь падут грады, вознегодует на них вода морская: реки же потопят я нагло. Сопротив станет им дух силы, и яко вихорь развеет их, и опустошит всю землю беззаконие, и злодейство превратит престолы сильных. Слышите убо, царие, и уразумейте: навыкните, судии концев земли. Внушите держащии множества, и гордящиися о народех языков: яко дана есть от Господа держава вам, и сила от Вышняго.
Премудрости Соломони чтение
Праведник аще постигнет скончатися, в покои будет: осудит же праведник умираяй, живущия нечестивыя. Узрят бо кончину праведнаго, и не разумеют, что совещаша о нем: яко повержет Господь нечестивыя безгласны ниц, и поколеблет их от оснований, и до последнего исчезнут в болезни, и память их погибнет. Приидут бо в помышление согрешений своих ужасни, и обличит их сопротив беззакония их. Тогда станет в дерзновении мнозе праведник пред лицем оскорбивших его, и отметающих труды его. Видевше же его смятутся страхом многим, и ужаснутся о преславном спасении его. Рекут бо в себе кающеся, и в тесноте духа воздохнут, и рекут: сей бе, егоже имехом некогда в посмех, и в притчу поношения безумнии. Житие его вменихом неистово, и кончину его безчестну. Како вменися в сынех Божиих, и во святых жребий его есть; убо заблудихом от пути истиннаго, и правды свет не облиста нам, и солнце не возсия нам. Беззаконных исполнихомся стезь и погибели, и ходихом стези непроходны, пути же Господня не разумехом.
На литии стихиры, глас 6:
Днесь лжесловие яко паучина растерзается, / днесь истины свидетельство красуется светло, / днесь Церковь первородных паки ликовствует / памятию исповедника новаго, / вернии утешение в напастех обретаем, / отступницы же студом покрываются, / яко Престолу Небесному светло предстоит святитель Василий, / и молится о душах наших.
Аще и руганием и ранами искусиша тя нечестивии, / но ничтоже на тя возмогоша, святче Василие, / Богу от соблазна греховнаго тя покрывающу, / темже и ныне поприще скончавше страдания, / о нас молися непрестанно, / пути уклонитися широкаго, / на теснем же пути не поползнутися, / но в радости невозбранно достигнути, / идеже ты ныне пред Господем ликуеши.
Слава, глас 6:
Ты еси пастырь добрый и учитель изрядный, / святителю Василие, / тя всегда восхваляюще, вопием: / тобою Бог украси церковь Матере Своея, / и тело твое, за паству твою во изгнании пострадавшее, / многолетно же в земли сокровенное, / престолу твоему возврати, и люди твоя возвесели. / Темже моляся не престай о хвалящих и чтущих память твою, / прося оставления грехов / и спасения душам нашим.
И ныне, глас тойже:
Бога из Тебе воплотившагося, разумехом, Богородице Дево: / Того моли о спасении душ наших.
На стиховне стихиры, глас 8:
Светильниче Василие, / во отрочестве твоем от потопления десницею Божиею спасенный, / в сем узревый образ спасения от многомятежнаго моря житейскаго, / сердцем же чистым от юности мудрость века сего презревый, / по отцу тезоименит Преображению бывый, / образ преображения Евангелием Христовым в житии твоем показавый, / славу являя святыя веры и твердость ея, / якоже можаху человецы вместити, / сего ради почитаем тя.
Стих: Честна пред Господем / смерть преподобных Его.
Святителю предобрый, / аще и мирския отступль мятежныя молвы, / но паству твою до конца возлюбивый, / неленостно поучая люди в законе Господни, / пешеходяще апостольски, / в молитвах теплых предстоя со слезами, / и тем, блаже, укрепляемь, положил еси душу свою за овцы твоя, / от нихже инии оставиша тя, друзии же предаша врагом, / инии же в сердце слагаша словеса уст твоих, / и плод сторичный приношаша Господеви, / сего ради молимся, моли спастися всем нам.
Стих: Блажен муж бояйся Господа, / в заповедех Его восхощет зело.
Земле Русская, кровми новомученик удобренная, / радуйся, яко стяжала еси предстателя теплаго, / града Кинешмы всеславное украшение. / Блажен еси, исповедниче непобедиме, Василие, / на земли не искавый пребывающаго града, но грядущаго взыскавый, / сего ради святителю Кириллу сопричтенный, / и край Зырянский просветивый скорбми, / не остави нас, восхваляющих тя.
Слава, глас 5:
Павлу Божественному подражая, / всем вся воистинну был еси, отче Василие, / многая чада спасены Христу привел еси, / и ныне на Небеси царствующи, / не забуди и нас, во странствии сущих, / к раце мощей твоих усердно притекающих, / моли, Егоже возлюбил еси Христа, / да спасет души наша.
И ныне, Богородичен, глас тойже: Храм и дверь еси:
Тропарь, глас 5:
Новый исповедниче Церкве Российския, / Апостольских трудов подражателю, / веры правыя теплый проповедниче, / Писаний вдохновенный изъяснителю, / изгнания, темницы и скорби от безбожных претерпев, / царское священие, отче наш Василие, / и ныне предстоя Святей Троице, / молися за отечество твое и люди, / чтущия достойно святую память твою.
Ин тропарь, глас 4:
Днесь колена разслаблена укрепляются, / изнемогшия руце на молитву простираются, / очеса умилением орошаются, / слухи же псалмы и песньми оглашаются, / се бо к нам во славе приходит Христов свидетель верный, / Василий Царственный и Всеблаженный, / лжи и злобы победитель, Златоустов подражатель и веры ревнитель, / темже образ подает верным спасения, / и молится о иже верою и любовию чтущих память его.
Слава, и ныне, Богородичен.
На утрени
По 1-м стихословии седален:
Реками веры исповедания, прелести угасил еси злославие, во еже не мнити со адом завет заключити, славне, молитвою и словом люди исцеляя, чудотворением и любовию просвещая концы, сего ради венча тя Христос, отче небошественне Василие.
Слава, и ныне, Богородичен:
Небесную дверь и кивот, и пресвятую гору, светлый облак воспоим, купину неопалиму и словесный рай, греха прародительскаго избавление и земли Русския Державную Заступницу.
По 2-м стихословии седален:
Возсияв якоже светило великое, якоже крин райский процвел еси, небоявленне Василие, аще и всеми оставлен был еси, обаче Христос прият тя, и ничтоже тя разлучи от Его любве, сего ради молися, да и мы причастницы явимся Царствия Его.
Слава, и ныне, Богородичен:
В напасти многоплетенныя впадохом, Владычице, бурею одержими безчисленных грехов, темже притекаем Твоей благости: просвети нас Светом Сына Твоего, и не остави нас, Благая, безпомощны.
Величание святительское.
Псалом избранный: Услышите сия вси языцы:
По полиелеи седален, глас 4:
Божественным Духом просвещен, проповедал еси пред безбожными Православия светлость со дерзновением, всеблаженне Василие приснопамятне, и мучителей тем посрамил еси, гонения же от чуждих и присных претерпел еси, темже моли Жизнодавца, даровати прощение грехов и веры утверждение любовию кланяющимся раце мощей твоих.
Слава, и ныне, Богородичен:
Кийждо идеже спасается, тамо праведно и притекает, кое же прибежище обрящем паче Тебе, или кую надежду взыщем в напастех, Безневестная Пречистая Марие.
Степенна, 1-й антифон 4-го гласа.
Прокимен: Честна пред Господем смерть преподобных Его.
Стих: Что воздам Господеви о всех, яже воздаде ми?
Евангелие от Луки, зачало 64.
По 50-м псалме стихира, глас 6:
Святителю Василие, исповедниче Христов, / во всю страну Российскую изыде твердости твоея сияние, / темже посрамися лукавое собрание беззаконнующих, / людие же Христовы укрепишася, / руце на молитву воздвигоша, / и образ смиреномудрия и любве твоея зряще, / припадают ти прилежно: / помолися усерднейше, о чтущих память твою верно.
Канон, глас 2, егоже краестрочие разумно чтется.
Песнь 1
Ирмос: Грядите, людие:
Радостию соберитеся мучениколюбцы вси, в памяти святителя Василия, новаго исповедника, торжествуем светло, врага поправшаго, веру соблюдшаго и ко Христу многи приведшаго.
Евангельским словесем измладенства навык и благодатию Божиею покрываемь, семя жизни нетленныя в души твоей возрастил еси, последи же сеятель добрый на ниве Христове быв, Вышняго благим устроением.
Шествие твое ко Иерусалиму горнему от младенства предуведено бысть, яко славное и добропобедное, ты же воли Господни повинуяся, тщанием всемерным благословение Сего утвердил еси.
Богородичен: Едина в женах благословенная, моли, Богородице Дево, Егоже родила еси от чистых кровей Твоих спасти благочестно поющия Тя.
Песнь 3
Ирмос: Утверди нас в Тебе, Господи:
Милость богатую на тебе Господь показа, егда внят молитве твоей от потопления воднаго спасе тя, ты же, отче, обет исполняя, от мирскаго погружения душу изъяти потщался еси.
Слова Божия проповедника неустанна почитаем тя, отче, и сказателя Писаний изрядна, яко люди притекающия в вере наставляеши и ко скорбем находящим за имя Христово преславно уготовляеши.
Богородичен: Кую Ти похвалу достойную от нечистых устен принесу, о Владычице, точию, якоже осужденник предстоя пред Тобою вопию умиленно: милостива буди ми и спаси мя, Едина Благословенная.
Седален, глас 4:
Веры правыя утверждение и смирения образ, дарований духовных сокровище и словес Божественных цевницу немолчно восхвалим ныне Василия, Кинешемскую похалу, к немуже притекающе вопием умиленною душею: исправление даруй нам, малодушным, и от пропасти погибели возстави унывающия ны, да стопам твоим последующе терпеливно, улучим грехов оставление.
Слава, и ныне:
В напасти многоплетенныя впад, погубих талант, вверенный мне от Господа, сего ради молю Тя, Пречистая, не попусти конечне погибнути верою и любовию чтущим Тя.
Песнь 4
Ирмос: Услышах, Господи, славное Твое смотрение:
Иерейства саном почтився и епископскую харизму прияв, на служение Церкви гонимей приходиши, отче, яко добрый пастырь, оградити овчарню Христову от волков лютых.
Монашескаго подвига образ явил еси, отче Василие, в келлии тесней всенощно моляся, днем же во храме Дары Священныя Господеви принося и люди твоя наставляя, яко пастырь изрядный.
Богоборцы лукавии запяти тя помышляху, якоже саддукее древле со иродианы Христа искушающе, твое же утверждено слово пребысть, козни злоначальника до конца низлагающее.
Богородичен: Рабски ныне припадаю Ти, Богомати, оставления прося злых моих всех, что же воздам Ти, не вем, за яже даров Твоих насладихся, точию песнь древлеангельскую сердцем сокрушенным воспеваю Ти: радуйся, Благодатная.
Песнь 5
Ирмос: Света Подателю и веков Творче, Господи:
Агнца Божия нас ради распятаго всенощным славословием воспевал еси, кийждо пяток неседальное пение приносяще, темже и сам себе непорочное заколение Тому уготовляеши, и верныя в крестнем подвизе укрепляеши.
Твоему, Василие, дару ведения духовнаго, како вернии не дивимся, вражия бо козни прозреваеши и судьбы Господни истинныя верным сказуеши, всех же ко спасению душ наставляеши.
Исцелений благаго подателя и молитвенника о недужных дерзновенна вернии тя обретоша, отче Василие, темже дар сей еще в жизни временней стяжавый, источи ныне богатно чтущим любовию память твою.
Богородичен: Ярости суднаго дне трепещу аз окаянный, благодатию Сына Твоего ущедрен сый, заповеди же Его Божественныя презрех и верен Тому не пребых, но молю Тя, Владычице, в день страшный последний изми мя огня негасимаго.
Песнь 6
Ирмос: В бездне греховней валяяся:
Мутныя лести потоки и наваждений бесовских множества словом твердым твоим воспятил еси и молитвою твоею в конец изсушил еси, верныя же от обольщения злаго премудро покрыл еси.
Утверждение веры крепкое и бесовския лжи обличителя светло почитаем тя, отче Василие, прилоги бо враг невидимых зриши и служителей их земных посрамляеши.
Богородичен: Твоему еже о нас промышлению како не дивимся, Владычице, гнев бо праведно на ны движимый утоляеши, темже и от смерти напрасныя покрый нас и даруй нам прежде конца покаяние.
Кондак, глас 3:
Мужество твое, святителю Христов Василие, восхваляем, / и чистоту веры превозносим, / и дару словес твоих удивляемся, / яко от небес приял еси Божественную благодать / наставляти и защищати стадо Христово.
Икос
Мудрование плотское отринув, все упование твое в небесных заключив, под чуждое ярмо не преклонился еси, темже в мире лукавом сем душу целу соблюл еси, двоедушныя же посрамил еси. Ныне молим тя, отче Василие, пастырем нашим ревность святую по Бозе испроси, во еже наставляти и защищати стадо Христово.
Песнь 7
Ирмос: Образу златому на поле Деире служиму:
Егда добродетельми иноческими преславно украсился еси, егда стадо твое ко страданию за веру предуготовал еси, тогда повелением Зиждителевым сам к Голгофе твоей преславно восходиши, победным шествием верныя назидая, поющия: препетый отцев Господь и Бог благословен еси.
Широких путей уклонився, врагом Христовым не поклонился еси, ниже радоватися тем глаголал еси, радость бо и утешение на Небесех имеяй, скорби, изгнания и заточения подъял еси, вопия: препетый отцев Господи и Боже, благословен еси.
Евангельскому словеси последуя, до конца себе отверглся еси, крест Господень на рамо взем, сего ради и разумение Писания истинное приял еси от Владыки, талант тебе вверившаго и за делание верное паки приложившаго.
Богородичен: Не послужиша Богоборцем нечестивым все множество новых страдальцев Российских, ниже злым делом их благоволиша, упованием бо на Тя, Владычице, препоясашася, Ты же и нас от всякия напасти покрый и от искушения лютаго избави.
Песнь 8
Ирмос: В пещь огненную ко отроком:
Иудиным не прельстився соблазном, правду Христову до конца возлюбив, лести безбожник лютых ни на иоту не уступил еси, и от братий, во истине не устоявших, уклонился еси, Единаго Господа поя во вся веки.
Единожды во лжу поползшияся восхождение не удобь обретают, аще и многими слезами покаяния взыщут, ты же и в малом и в великом пребыл еси верен, отче Василие, темже и ныне со ангелы Господа превозносиши во вся веки.
Богородичен: Быша слезы наша нам хлеб день и нощь, о Благая Владычице, яко путь праведный и заповеди Сына Твоего презрехом, волею страстем поработахом, неволею же в плен греховный ведохомся, како песнь Господеви воспоем во исповедании правом?
Песнь 9
Ирмос: Безначальна Родителя.
Воистину всяк язык изнеможет болезни твоя, и узы, и изгнания воспети, о святителю Василие, кая бо темница не име тя узника, ты же крепчае всех сопротивных пребыл еси, Господу преславно покрывающу тя.
Аще и оставиша тя вси приснии твои, волею же и неволею отлучаеми, но Помощника и Покровителя твоего благодатию покровен, неотлучен от Того пребыл еси, Емуже и ныне на небесех предстоиши во славе.
Еже ко Господу отшествия твоего час ощутив, исходное пение просил еси пети, сам же конец сего совершив, душу твою добльственную ангелом светло предстоящим предаеши, яко сокровище многоценное и брани невидимыя корысть благую.
Богородичен: Твоих щедрот потоку обильному присно радуемся, Богородице, аще и заграждаем оный грехами своими, но Сама исправление нрава злаго даруй нам, о Благая, да Тя непрестанно величаем.
Светилен:
Возсия яко заря пресветлая память твоя, о святителю Евангельскаго слова, светильник ногам нашим показующая и к невечернему свету верныя вся возводящая.
Слава, и ныне:
Аще и поругани быша храми Твои, Владычице, и вменишася яко овощная хранилища и места непотребная, обаче десница Господня наказа хульники и гонители, людие же Божии святии, предреченное праведными мужи зряще, восхвалиша Бога творящаго великая и дивная на земли.
На хвалитех стихиры, глас 6:
О, святителю Христов Василие, / по имени твоему и житие твое, / первее бо над страстьми воцарився, / царь и епископ сердца своего был еси, / душу бо и тело Царю царей непорочно представил еси, / последи же долготерпением страдальческим / всесожжение тучно себе самаго привел еси, / темже и ныне с Ним царствуя, / моли о душах наших.
О, пречудне святителю Василие, / ты яко лев дерзновенно во истине ходил еси, / упованием непоколебимым мучителей возношение посрамил еси, / воистину царственное священство твое показав, / Кротчайшаго Иисуса воевода изрядный, / моли о душах наших.
О, премудре святителю Василие, / по имени твоему и подвиги твоя, / в правду бо яко в багряницу оболкся, / лжи порфиру яко смрадныя рубы показал еси / и яко плетение паучиное расторг, / Царю Царей непорочно хваление приносиши, / моли о душах наших.
Слава, глас 8:
Врата адова Церкве Христовы не одолеют, / аще бо и лепота храмов ея отымется, / аще и оскудеют на земли Христови воини, / аще и иссякнет любы многих, / аще и избраннии прельщени будут, / аще и пророчества умолкнут, / аще и истинная знамения Божественная престанут, / аще и лжехристи во множестве приидут, / претерпевшие же до конца спасени будут, / зане любве Твоея Господи николиже отпадают, / и в Небесныя чертоги верным не заграждается восход, / темже и к Тебе припадаем, Многомилостиве, / со Святителем Василием и новыми страстотерпцы Российскими сопричти и нас, / зде молящихся Ти.
И ныне, глас тойже:
Владычице, приими молитвы раб Твоих, / и избави нас / от всякия нужды и печали.
Славословие, и отпуст, и первый час.
На Литургии
Блаженны на 8, от 3-й и 6-й песней канона. Прокимен, глас 1: Уста моя возглаголют премудрость / и поучение сердца моего разум. Апостол ко Евреем, зачало 335. Аллилуиа, глас 2: Уста праведнаго поучатся премудрости, и язык его возглаголет суд. Евангелие от Матфеа, зачало 11. Причастен: В память вечную будет праведник:
Молитва
О пречудне отче Василие, святителю Христов, истины поборниче, пастырю добрый словесных овец, подвигом добрым подвизавыйся, дерзновенно гонителей веры правыя обличивый и никакоже делом христоборцев соблаговоливый!
Праведен сый, яко лев уповая ходил еси, и на Господа надежду возложив, во век не постыделся еси. Вемы, яко воистину правда твоя от смерти тя избави: се бо на земли старости маститы достигнув, христианския кончины мирныя и славныя сподобился еси, и от вечныя смерти избавлься, на небесех победою венчался еси. Вемы, святителю Христов, яко мудрование плотское посрамив, и пути живота вечнаго показав, ныне молишися о нас, любовию память твою почитающих и путем твоим последовати произволяющих, да не прельстимся и мы соблазном благ тленных, от лукавых миродержителей нам обещаемых, да не приобщимся делом врагов Христовых, тьму светом, а свет тьмою нарекше, тьмою кромешною навеки да не покрыемся.
Ей, молим тя, святителю, предстани нам в час искушения, и глас совести христианския да возгремит в сердцах наших, непщевания же лукавая да умолкнут. И подаждь нам твоими молтвами внимания и трезвения дар многоценный, во еже на всяк час исход из жизни сей помышляти и ко ответу благому пред Судиею Неумытным уготоватися, да неосужденно сподобимся купно с тобою и со всеми Новомученики Российскими воспевати Всесвятое Имя Отца и Сына и Святаго Духа во веки веков. Аминь.
Зри: В рукописях этой службы встречаются иные указания для Божественной Литургии:
Прокимен, глас 4: Святым, иже суть на земли Его, удиви Господь вся хотения Своя в них. Стих: Предзрех Господа предо мною, яко одесную мене есть. Апостол к Коринфяном, зачало 153. Аллилуиа, глас 2: Сященницы Твои облекутся в правду, и преподобнии Твои возрадуются. Евангелие от Матфеа, зачало 34. Причастен: Радуйтеся праведнии о Господе, правым подобает похвала.
Василий (Преображенский), Кинешемский еп., свт., исп.: †1945